Jalan santai bersama HIMA JAWA FBS UNY | Sabtu 26/10/2013 | 06.30 WIB | GK IV FBS UNY | HTM 15rb

Waos Salajengipun →

OPEN RECRUITMENT PANITIA PAK (Pentas Akhir Kepengurusan) Hima PBD FBS UNY

Dhumateng kanca-kanca mahasiswa PBD angkatan 2012 lan 2013 ingkang kepengen dados panitia PAK formulir saged dipunpundhut wonten ing koordinator kelasipun piyambak-piyambak. Matur nuwun..

Waos Salajengipun → OPEN RECRUITMENT PANITIA PAK (Pentas Akhir Kepengurusan) Hima PBD FBS UNY

Wayang Kulit Diorak-arik Kahanan, Apa Tenan?

Salah satunggaling warisan budaya ingkang kasebat kondhang lan nedahaken bilih bangsa Indonesia menika sugih tembunge, wibawa solahe, inggih Pagelaran Wayang Kulit. Nalika Jaman taksih pinayungan kanjeng sunan, Wayang Kulit menika minangka sarana kangge nepangaken ajaran islam ingkang ancasipun ngowahi kahanan gesangipun masyarakat ingkang ketingal blawur kaliyan agama. Awit saking menika wayang salajengipun dipunwastani tontonan ingkang ngandhut tuntunan.

Ubek ogaking budaya asing wontening jaman samenika, kasebat ndamel ajrih bilih kawontenan wayang saged katindhih owahing kahanan menika. Jumbuh kaliyan menapa ingkang dipunraosaken dening kawula mudha ingkang mrihatosaken babagan perkawis menika, pramila BEM FBS UNY kerja sama kaliyan HIMA JAWA ngawontenaken “Bincang Bimbang Mahasiswa” mapan ing Pendhapa Teja FBS.

Kangmas Hendro (Korbid Pedhalangan Kamasetra 2012) minangka pamedhar sabda wontening adicara menika ngendikakaken bilih wayang kulit menika, sejatosipun badhe tetep wonten ing kalampahan gesang menika, awit saking pamirsanipun ingkang ugi taksih ngremenaken bilih wayang kulit menika dipunpentasaken. Ing pangertosan, bilih tanggel jawab dhalang menika, kedah saged narik pamirsanipun supados langkung remen kaliyan wayang kulit.

Adicara ingkang kalaksanan ing dinten Rebo Pon, surya kaping 24 April 2013 tabuh 19.30 WIB menika, ugi mbikak dhiskusi kaliyan Dr. Suwardi, M.Hum minangka Pangarsa Jurusan Pendidikan Bahasa Daerah UNY. Saking pangandikanipun Bapa Suwardi, bilih kahanan ingkang ndamel owah lan gingsiripun kawontenan wayang salah satunggalipun, inggih persepsi bilih wayang menika paring tuladha kekerasan dhumateng para mudha, awit wonten sarantaman pasugatan wayang menika wonten adhegan perang antawisipun satriya kaliyan buta. Ananging, kasunyatan menika namung katilik saking sudut pandang ingkang setengah-setengah. Sejatosipun mbok bilih kersa ndhedhah babagan saking lampah lakunipun Arjuna wontening pewayangan menika estunipun kathah filosofi-filosofi ingkang paring piwucal unggah-ungguh.

“eee.. bleg geduwek uget-uget” wuda raosipun Bapa Suwardi ngregengaken swasana.

Ing pungkasan, bilih wayang kulit ing wekdal sakmenika gadhah panggadhang-gadhang mboten namung paring tontonan ananging ugi kedah saged ndherek nyengkuyung pendidikan karakter kangge para mudha.









[winarni]

Waos Salajengipun → Wayang Kulit Diorak-arik Kahanan, Apa Tenan?

Lakone Negara

Wus kedaden lakon bangsa nandhang sungkawa

Konangan ing kanyatan

Eluh getihe wong cilik muspra aji

Ketenggel salaku jantrane kang murba wisesa

Rumangsa melu handarbeni

Sakabeh-kabeh dikukuti

Among nguja awake dhewe

Tan kena kendat lan cinegah

Dening apa kang dadi darmane

Yen wis tiba wancine

Kang salah bakal seleh

Nadyanta wus sinebat satria kondhang kuncara

Iku mung amarga durung wayahe kangerten

Laku hambeging dasamuka

S e r a k a h!

kanyatan, rakyat ora bisa ngonangi kanthi mata kentara

Ananging, rasa kapidhak, katindhas ukum welut negara

nyata krasa nekak gulu,

durung garing koreng wingi sore

malah reka-reka katindhih maneh banyu tremos ngutahi

ora beda kaya dene watak sengkuni

lamis, umuk!!!

yen panguwasa nagara kelakon ngrubengi akal okole para kurawa

bakal panggih wancine

negara ambruk amarga penuwune dhewe.



-Winwin Onora-

Waos Salajengipun → Lakone Negara

Keli Ning Aja Ngeli

kautaman piwulang adiluhung

ketenggel kelawan kang murba misesa

nalika sruning budaya lan sastra 

sirna ngeli sinebut kari separo

sajroning ati mung ngudarasa

apa iki pancen wis tumeka ramalan Prabu Jayabaya

wong jawa kari separo

wong jawa ilang jawane

aku iki ditundhung minggat 

saka lemahku dhewe

gremat-gremet ngudhali kawruhing budaya

kono kene mung sinawang blawur

Ah iyo,

Karepe ben diarani modern

Nanging ngertiya, dhewe iki ketinggalan jaman iya, kelangan jawa iya uga.

---------------------------------------------------------------------------------

Jawa Geger? Ketaman saweg nandhang gela, amargi salah satunggaling unsur budaya jawa, inggih menika basa jawa badhe dipunpegat kawontenanipun dening ingkang mengku kuwasa pamarintahan. Kados pundi bangsa Indonesia menika badhe dipunajeni dening bangsa sanes, menawi kanyata piyambakipun mawon mboten kersa ngajeni dhumateng awakipun piyambak. 

Ketingal saking wacana Menteri Pendidikan, Muhammad Nuh ingkang badhe nilaraken basa daerah wonten sakjroning kurikulum. Ing wekdal samenika, lumrah kemawon mbok bilih dereng rumaos kelangan menapa ingkang saged dipungadhang-gadhang dados identitas bangsa Indonesia menika ing mancanegara, ananging lelampahan kalawau badhe cetha gawang-gawang ngalarani ati ing wekdal samangke, menawi kita nemahi bilih Jawa sampun mboten gadhah menapa-napa malih, ateges, budaya ingkang dados ciri kapribaden Jawa menika sampun tilar. Bhinneka Tunggal Eka, ingkang nedahaken bilih Indonesia menika gadhah mawarni-warni kabudayan ugi saged lengser, saking lelenggahipun minangka semboyan kanegaran ingkang sampun ndamel kondhang Indonesia wonten ing mancanegara. Kaluhuran budi pekerti saha kautaman piwulang jawa, kanyatan ilang muspra menawi kabudayan lokal menika mboten dipunuri-uri malih. 

Wacana pemerintah ingkang karangkum wontening kurikulum 2013 kalawau sampun dipunuji publik, mbok bilih samangke respon sarujuk menika langkung kathah, saged kadadosan menawi basa daerah menika, mliginipun basa jawa estu dipunicali saking bangku sekolah, amargi kawontenan jam mucal menika dipunewahi langkung sekedhik. 

Bilih kabudayan nasional menika kempalan kabudayan daerah, sejatosipun namung badhe dados angen-angen kemawon, menawi wacana kurikulum 2013 ingkang ngrembag kawontenan basa daerah kalawau estu dipunlampahaken ing taun ngajeng. Amargi kawontenan wekdal mucal ingkang sakedhik, andadosaken upaya nepangaken budaya jawa kawastan kirang utawi langkung kirang jangkep.

Forum Peduli Bahasa Daerah ingkang dipunmandegani dening Mahasiswa Jurusan Pendidikan Bahasa Daerah Universitas Negeri Yogyakarta, dinten Selasa surya kaping 15 Januari 2013 nindakaken aksi dhateng Kantor DPRD Provinsi DI. Yogyakarta. Saperlu caos panyaruwe dhumateng para wakil rakyat, bilih para kadang mahasiswa menika ajrih menawi basa daerah menika dipunicali saking kurikulum 2013. Pramila, saperangan saking wakil mahasiswa kaliyan Bapak Ibu Dosen katimbalan supados ndherek audiensi wontening salebetipun ruang sidang. Asiling jejak dengar pendapat kaliyan anggota dewan, inggih menika DPRD Provinsi segah bilih basa daerah, mliginipun basa Jawa kedah mlebet kurikulum kanthi paugeran ukum ingkang dipundamel kaliyan pemerintah daerah ingkang awujud PERDA. [winarni]

Waos Salajengipun → Keli Ning Aja Ngeli